نحن وبنو إسرائيل

نحن وبنو إسرائيل

قصة بنى إسرائيل أكتر قصة اتذكرت فى القرآن أكيد فيه حكمة ورا كده؟

بنى إسرائيل كان فيهم حاجات كتير غلط وأمراض كتير ممكن تصيب أى مجتمع وربنا حذرنا منها وتعالوا نشوف  حاجات منها:

التقليد فى غير ما يفيد:

بنى إسرائيل ربنا أنعم عليهم فى وقت كانوا فقدوا فيه الأمل أما نجاهم من فرعون وشق لسيدنا موسى البحر وأول حاجة عملوها فى مقابل نعمة ربنا إنهم راحوا يقلدوا مجتمع تانى انبهروا بيه ويا ريت هيقلدوه فى الصناعة والزراعة عشان يبدأوا يبنوا أمة ودولة قوية إنما قلدوه فى الحاجة الوحيدة اللى هما أحسن من العالم كله فيها فى الوقت ده,

"قالوا يا موسى اجعل لنا إلهاً كما لهم آلهة"

النخبة الفاسدة:

لما طلبوا من سيدنا موسى إنهم يقابلوا ربنا ويسمعوا كلامه فاختار منهم سبعين رجلاً كانوا دول النخبة بتاعتهم

"واختار موسى قومه سبعين رجلاً لميقاتنا"

النخبة دى بدل ما تهتم باللى هيفيد المجتمع وتستعد إنها تحمل الرسائل الربانية للناس أما ترجع ليهم كانت قلوبهم فاسدة وعاوزين مصلحتهم الشخصية بس وقالوا لسيدنا موسى

"أرنا الله جهرة فأخذتهم الصاعقة وهم ينظرون"

الجاهل يفتى فى وجود العلماء:

أما سيدنا موسى راح يقابل ربنا ترك فى قومه سيدنا هارون عشان يرجعوا ليه ويسألوه أما تلتس عليهم حاجة فى دينهم

هما مشوا ورا كلام واحد اسمه "السامرى" مكنش عنده علم بس هوا كان بيحب يفتى فى الدين وفى كل حاجة قالهم يا جماعة موسى نسى هيقابل ربنا فين وربنا هنا لسه معانا وعمل ليه عجل من دهب وقال لهم ده إلهكم وإله موسى فاعبدوه

فأخرج لهم عجلا جسدا له خوار فقالوا هذا إلهكم وإله موسى فنسي" "

وهما مش يرجعوا لسيدنا هارون النبى لأ خالفوه وقالوا إن السامرى صح عشان خدعهم بشوية كلام وسحر وطبعاً أما سيدنا موسى رجع دمر العجل ده وربنا عاقب السامرى وعاقب بنى إسرائيل كلهم

" "وإذ قال موسى لقومه يا قوم إنكم ظلمتم أنفسكم باتخاذكم العجل فتوبوا إلى بارئكم فاقتلوا أنفسكم ذلكم خير لكم عند بارئكم

الأمور مقلوبة:

أما تتقلب فطرة المجتمع كله والأمور عنده تبقى مقلوبة فمعتش يعرف يفرق بين الصح والغلط والمفيد والضار,ربنا أنعم عليهم بالرفاهية فكانت الحسب بتظلهم من الشمس وكان أكلهم لحوم الطير وحلويات وكانت الحاجات دى آية ومعجزة  ليهم

"وظللنا عليكم الغمام وأنزلنا عليكم المن والسلوى كلوا من طيبات ما رزقناكم"

 إنما هما طلبوا من ربنا الفول والعدس والبصل مع إنها مش محتاجة معجزات وكل البشر ممكن يزرعوها

 "وإذ قلتم يا موسى لن نصبر على طعام واحد فادع لنا ربك يخرج لنا مما تنبت الأرض من بقلها وقثائها وفومها وعدسها وبصلها قال أتستبدلون الذي هو أدنى بالذي هو خير اهبطوا مصرا فإن لكم ما سألتم"

أنا كتبت بالعامية بس عشان حسيت إن كده هيوصل أسرع لناس كتير

لو انت شايف الكلام ده فعلاً بيحصل اللوقتى

اعمل شير

^ـــ*